KE i FFK-së lejon 6 lojtarë të huaj në klubet e Superligës

Komiteti Ekzekutiv i FFK-së ka mbajtur të martën mbledhjen e vet të radhës nën kryesimin e Fadil Vokrrit. Në këtë mbledhje KE shqyrtoi Raportin e Komisionit për Futsall mbi përgatitjet për fillimin e Ligave të Futbollit të vogël.
Ismajl Kosumi kryetar i këtij Komisioni i bëri të ditur KE-s mbi përgatitjet që po bën ky komision që Liga e Futsallit të fillojë në nëntor edhe atë në Superligë dhe në Ligën e parë. Kosumi pastaj referoi se në bashkëpunim me Komisionin për akte normative është duke u hartuar e gjithë infrastruktura ligjore për këtë degë dhe po bëhen të gjitha përgatitjet për një fillim sa më të suksesshëm. Po ashtu në këtë mbledhje KE miratoi edhe disa Rregullore të FFK-së në drejtim të konsolidimit të akteve normative të FFK-së. Në këtë mbledhje KE në pajtim me Statutin e ri dhe në bazë të propozimeve që kishin arritur nga Lidhjet rajonale të gjyqtarëve zgjodhi Komisionin për Çështje të Gjyqtarëve. Kështu për kryetar të këtij komisioni zgjodhi Ruzhdi Brezhnicën, ndërsa për anëtarë: Mustafa Domin nga Gjakova, Ejup Jakupin nga Prizreni, Ismet Shurdhanin nga Ferizaj, Skënder Hoxhën nga Gjilani, Shyqyri Gashin nga Peja, Sadik Rrahmanin nga Mitrovica dhe Nijazi Shuletën nga Prishtina. Ish-kryetarin e SHGJFK-së dhe ish-gjyqtarin ndërkombëtar, Shinasi Berisha, KE e emëroi Këshilltar special të KE-së për çështje të gjyqtarëve. Gjithashtu KE miratoi programin e punës së përzgjedhësit Edmond Rugova për periudhën e ardhshme deri në fund të vitit. KE i FFK-së në këtë mbledhje po ashtu mori vendim që të kufizoi numrin e lojtarëve të huaj që mund të aktivizohen në Ligat e futbollit të Kosovës. Kështu skuadrat në Superligë mund të aktivizojnë më së shumti 6 lojtarë të huaj. Në Ligën e parë 4 lojtarë, ndërsa në ligat juniore dhe në Ligën e dytë nga 2 lojtarë.