Është ky Interi që kërkon Mourinjo!

Kupën Bekenbauer dhe atë Pirelli, Interi sapo i ka fituar. Gjatë ceremonisë së dhënies së çmimeve, Klose iu afrua kapitenit Zaneti dhe e pyeti: “Sa kohë keni që stërviteni?” Përgjigjja ishte: “Njëzet ditë.” Golashënuesi gjerman zgurdulloi sytë, shprehia e tij ishte përzierja e adhurimit dhe demoralizimit. Ndeshja e parë e Mourinjos në Europë la shenjë. Këtë donte edhe trajneri nga Setubali, i cili në Mynih kishte shkuar vetëm për të fituar, sepse ana psikologjike vlen më tepër se shumë stërvitje në “Mourinjolandia”.
I PAPËRMBAJTSHËM - Dhe duke parë shuplakat e fundit, të marra nga Juvja dhe Milani, atij iu shfaq në fytyrë një buzëqeshje gjithë ironi ndërmjet mureve të dhomave të zhveshjes të stadiumit Allianz Arena. Mister Mou kështu e ka, përfshihet brenda në sfidë, ka nevojë për konkurrencë. Zënkat verbale vetëm sa e karikojnë dhe specialiteti i tij është pikërisht të jetojë nën trysni: të ishte për të, do të luantë vetëm derbi, ndeshje Champions-i dhe finale të çdo lloji. Nuk qëndroi i ulur për asnjë çast në stol në Mynih, krejt ndryshe nga Mourinjo serioz dhe që mbante shumë shënime në tri ndeshjet e para. “E pranoj, mendoja vetëm për fitoren, tha ai, këtë ndeshje e kishim përgatitur shumë mirë taktikisht. Gjatë ditëve të fundit e kisha ulur intensitetin e stërvitjeve, në mënyrë që të ishim sa më në formë në ndeshjen ndaj Bajernit. M’u desh të mbështetesha më tepër tek ana mbrojtëse, kjo është e vërtetë. Zakonisht preferoj të kem një vijë që qëndron mjaft përpara, por në prapavijë na mungonin lojtarët e shpejtë: ndërsa, duke qëndruar më të ngjeshur, arritëm ta kufizonim shpejtësinë dhe aftësinë e Bajernit për të goditur me kundërsulm. Ajo që më pëlqeu më tepër ishte qëndrimi shumë i mençur i skuadrës time, nga pikëpamja taktike përmirësimi i djemve është kostant. E të mendosh që më mungon një skuadër e tërë për shkak të dëmtimeve, pak a shumë ashtu sikurse edhe Bajernit, ç’është e vërteta.” Megjithatë ka patur progrese të rëndësishme edhe nga këndvështrimi fizik: “Në fakt, në Torino, në turneun me tri skuadra, ndaj Milanit dhe Juves, ishim të lodhur që në fillim. Ndërsa të martën lodhja u ndie vetëm në 15 minutat e fundit.”
INTEGRIMI I SHPEJTË - Pak a shumë, kur doli nga fusha, Amantino Mansini, mbase ishte e dhëna më e mirë e mbrëmjes, dhe me siguri një nga më të pëlqyerat për Masimo Moratin. “Po luaj në pozicionin tim të përhershëm, tha braziliani 28-vjeçar, ndaj e kam patur të lehtë të integrohem në skuadër. Më pas jam shumë i motivuar dhe entuziast, çka është normale kur nis një aventurë të re. E kam mendjen në rregull dhe ndaj gjithçka është më e lehtë për mua…”. Fjala mendje i doli padashje në dialektin roman (capoccia) dhe buzëqeshi: “E kisha për kokën. Duke i lënë shakatë, të gjithë po përmirësohemi dhe sa më shumë kalojnë ditët, aq më të lehtë e kemi të zbatojmë udhëzimet e trajnerit Mourinjo. Mënyra e stërvitjes më kujton kohërat e fëmijërisë në Brazil, ku gjithçka kryhej me top. Është më bukur kështu dhe jo rastësisht nga ky Inter më pëlqen qarkullimi i topit, e dimë gjithnjë se ç’duhet të bëjmë dhe lodhesh më pak kur e dikton lojën dhe ritmin vetë.” Ndeshja e parë zyrtare është në program më 24 gusht, Superkupa italiane, pikërisht ndaj Romës së “tij”, “dhe atë ditë do të jemi në formë të shkëlqyer, jam i sigurt për këtë, - përfundoi anësori brazilian. - Duam të fitojmë, sepse është gjithnjë e rëndësishme ta nisësh mirë.”

Largimi i tyre, bashkë me atë të Stankoviçit, siguron paratë për Kuarezmën
Suazo, Krespo, Pelè, “burimi” i zikaltërve
Ata kanë mbetur në hije brenda skuadrës, aq sa kanë filluar të ndihen të tepërt. Aq të tepërt, saqë janë me njërën këmbë në Pinetinë dhe me tjetrën në një fluturim ajror të linjës. Pak rëndësi ka nëse bëhet fjalë për Alitalia apo Air France. Pelè, Suazo, Krespo: tri çështje delikate në kampin e Interit, të cilat, së bashku me Stankoviçin, mund t’i shërbejnë për një qëllim të rëndësishëm Mourinjos.
Trajneri portugez deri tani i ka aktivizuar fare pak ata. Në fakt, në tri miqësoret e fundit, ata nuk kanë lënë thuajse asnjë gjurmë. Bëhet fjalë për pak ndeshje, por edhe minutat që kanë luajtur ata s’kanë qenë të shumta. Pelè ka luajtur gjithsej 69 minuta (45′ ndaj Barit, 24′ ndaj Bajernit), Krespo 97′ (33′ ndaj Barit, 30′ ndaj Milanit, 10′ ndaj Juves, 24′ ndaj Bajernit), Suazo vetë 35′ (12′ ndaj Barit, 15′ ndaj Milanit, 8′ ndaj Bajernit). As që bëhet fjalë që ndonjëri prej tyre ta luante një ndeshje të plotë e madje as si titullarë nuk e kanë nisur ndonjëherë. Me pak fjalë, Mourinjo mund të bëjë edhe pa ta. Problemi është t’u gjendet një skuadër e përshtatshme dhe klubi shpreson të gjejë një zgjidhje, pse jo edhe t’i japë hua. Largimi i tyre mund të sillte goxha kursime edhe për sa u takon pagave. Nga tre lojtarët, më i kërkuari në treg është Peleja, i cili i intereson Portos në kuadër të çështjes “Kuarezma”.
Dhe pikërisht, Kuarezma është lojtari me të cilin Mourinjo dëshiron ta plotësojë organikën që ka marrë në dorëzim. Një organikë në të cilën hëpërhë ka dyndje. Pra, më parë duhet të mbërrijnë “shkurtimet” dhe më pas blerjet (ose më saktë, blerja). Me paratë e kartonit të Stankoviçit (ndodhet pranë Juves për 8 milionë euro) dhe ato të kursyera nga Suazo, Krespo dhe Pelè, lojtari mund të merret. Pra, Interi e ka gjetur një “burim” të ri të çmuar.

Toldo: Mourinjo ka mendësi fituesi
Ibrahimoviç, spektakël në stërvitje
Pasi mbërriti pardje në orët e vona të natës në Amsterdam, Interi u stërvit dje pasdite në qendrën sportive të Ajaksit. Dhe duke u ndier në atë mjedis si në shtëpi, “ish”-i Zllatan Ibrahimoviç dhuroi spektakël në mini-ndeshjet e ndryshme të organizuara për ata që nuk luajtën apo që u aktivizuan pak në Mynih. Ylli suedez nuk ndien më dhimbje në gju kështu që ka filluar të zbavitet sërish me “futbollin e rrugës”, i gjithi i përbërë nga veprime teknike, asiste me kokën në një krah dhe topin në anën tjetër dhe gola spektakolarë. Mourinjo ndihet tepër i lumtur, sepse Ibra do të debutojë më 15 gusht në Lisbonë, me rastin e Kupës Euzebioi ndaj Benfikës. Ndërsa Materaci, Kivu dhe Himenez kryen disa stërvitje të veçanta aerobike. Kurse Kruzi vijoi terapitë dhe punën me biçikletë, për shkak të problemit në pulpë. Askush nuk e kishte harruar, por është gjithnjë më mirë t’ua freskosh kujtesën “skeptikëve”: ai është gjithnjë i gatshëm kur ekipi ka nevojë për të. Françesko Toldo ka qenë një prej protagonistëve të suksesit të Interit të ri të martën në Allianz Arena ndaj Bajernit të Mynihut dhe tani ai e sheh me besim sezonin e zikaltërve: “Mourinjo përçon mendësinë e duhur dhe ka përvojën e duhur në nivelin europian. Por edhe ai do të ketë nevojë për dy-tre vite për të programuar fitimin e Ligës së Kampioneve. Sepse atë nuk e fitojnë gjithnjë më të fortët. Megjithatë, ne nuk do ta nënvlerësojmë kampionatin.”